Бишкек шаарынын мэриясынын Турак жай-коммуналдык чарба башкармалыгынын
ЖОБОСУ

1. Жалпы жоболор

1. "Бишкек шаарынын мэриясынын Турак  жай-коммуналдык чарба башкармалыгы" мекемеси (мындан ары - Башкармалык) Бишкек  шаарынын мэриясынын түзүмдүк бөлүмү болуп саналат.

2. Башкармалык өз ишин Кыргыз Республикасынын Конституциясына, Кыргыз Республикасынын  кодекстерине жана мыйзамдарына, Кыргыз Республикасынын башка ченемдик укуктук  актыларына, Кыргыз Республикасы катышуучу болуп саналган, мыйзамда белгиленген  тартипте күчүнө кирген эл аралык келишимдерге, Бишкек шаардык кеңештин  токтомдоруна, Бишкек шаарынын мэриясынын токтомдоруна жана буйруктарына, ошондой  эле ушул Жобого ылайык жүзөгө ашырат.

3. Башкармалык "муниципалдык мекеме"  уюштуруу-укуктук формадагы юридикалык жак болуп эсептелип, өз алдынча баланска,  алыш-бериш жана башка эсептерге, мамлекеттик жана расмий тилдердеги аталышы бар  гербдүү мөөргө, тийиштүү мөөрлөргө, штамптарга, өздүк эсептерге, фирмалык  бланктарга ээ, Кыргыз Республикасынын мыйзамдарына ылайык сотто доогер жана  жоопкер болууга укуктуу.

4. Башкармалыктын аталышы:

- мамлекеттик тилде: "Бишкек шаарынын мэриясынын  Турак жай-коммуналдык чарба башкармалыгы";

- расмий тилде: "Управление жилищно-коммунального  хозяйства мэрии города Бишкек".

5. Башкармалыктын юридикалык дареги - Кыргыз  Республикасы, Бишкек шаары, Байтик Баатыр көчөсү, 17.

2. Максаттары жана милдеттери

6. Башкармалыктын ишинин максаты Бишкек шаарынын  жергиликтүү өз алдынча башкаруу органдарынын турак жай-коммуналдык чарба (мындан  ары - ТЖКЧ) чөйрөсүндөгү саясатын ишке ашыруу жана пландарын, программаларын  аткаруу болуп саналат.

7. Башкармалыктын негизги милдеттери болуп  төмөнкүлөр эсептелет:

- Бишкек шаарынын жергиликтүү өз алдынча башкаруу  органдарынын турак жай-коммуналдык чарба чөйрөсүндөгү бирдиктүү саясатын ишке  ашырууда (же өткөрүүдө) ишканаларды координациялоо;

- турак жай чарбасын, жылуулук-суу-газ-электр  менен жабдуу тармактарынын, суу берүүнүн, көрктөндүрүү, жашылдандыруу, ошондой  эле санитардык тазалоонун жана катуу тиричилик калдыктары менен иштөө  объекттеринин иштешин жана өнүгүшүн ишенимдүү, натыйжалуу камсыздоо боюнча  координациялоону жүзөгө ашыруу;

- башкаруунун түрүнө жана менчигинин түрүнө  карабастан, турак жай-коммуналдык кызмат көрсөтүүчү жана муниципалдык тапшырыкты  аткаруучу уюмдардын жана ишканалардын ишин координациялоону жүзөгө  ашыруу;

- турак жай-коммуналдык кызматтарды көрсөтүүдө  жана муниципалдык тапшырыктарды аткарууда атаандаштык чөйрөнү өнүктүрүү; ТЖКЧ  чөйрөсүндөгү башкаруунун жана чарба жүргүзүүнүн рыноктук формаларын  киргизүү;

- муниципалдык имараттарда энергия натыйжалуулук  жана ресурстарды сактоо боюнча иш-чараларды өткөрүү;

- Кыргыз Республикасынын жана ТЖКЧ чөйрөсүндөгү  жергиликтүү өз алдынча башкаруу органдарынын мыйзамдарынын, токтомдорунун,  буйруктарынын жана башка ченемдик укуктук актыларынын аткарылышын камсыз  кылуу.

3. Башкармалыктын  негизги иш-милдеттери

8. Жүктөлгөн милдеттерди аткаруу максатында  Башкармалык төмөндөгү иш милдеттерди жүзөгө ашырат:

- ТЖКЧ тармагынын өнүгүү стратегиясын иштеп чыгуу  жана ишке ашыруу;

- турак жай-коммуналдык чөйрөгө тийиштүү жаңы  ченемдик укуктук актыларды иштеп чыгуу жана демилгелөө;

- шаардык чарба кызматтарынын чөйрөсүндө  муниципалдык тапшырыкты түзүү;

- шаардык кызматтарды жана калкты күзгү-кышкы  жылуулук берүү мезгилине өткөрүү жана даярдык көрүү боюнча иш-чаралардын  аткарылышын контролдоо;

- бюджеттик уюмдар тарабынан энергия ресурстарын  керектөө лимитин сактоону контролдоо жана аларды сарамжалдуу пайдалануу боюнча  чараларды иштеп чыгуу;

- энергия ресурстарын сактоо программасын ишке  ашырууга көмөктөшүү, жеке эсептөө жана сууну, газды, жылуулукту, электр  энергиясын жана башка энергия ресурстарын керектөөнү жөнгө салуучу приборлорду  орнотууну кошуу менен турак үйлөрдүн жана башка муниципалдык имараттардын  энергиялык натыйжалуулугун жогорулатуу;

- турак жай-коммуналдык чарба тармактары боюнча  узак мөөнөттөгү шаардык программаларды иштеп чыгуу;

- калкка жана ТЖКЧ тармагында чарба жүргүзүүчү  субъекттерге усулдук жана консультативдик жардам көрсөтүү;

- пайдалануучуларга керектөө стандарттарынын жана  ченемдеринин талаптарына жооп берүүчү турак жай-коммуналдык кызматтарын алууга  жардам берүү;

- мамлекеттик, коомдук жана башка органдарда  Бишкек шаарынын мэриясынын турак жай-коммуналдык чарба ишканаларынын  кызыкчылыктарын коргоо;

- райондук администрацияларга турак үйлөрдү  башкаруунун жаңы түрлөрүнө өткөрүү боюнча көмөк көрсөтүү: турак үй ээлеринин  шериктештиги жана башкаруунун башка түрлөрү, аларга усулдук жана консультативдик  жардам көрсөтүү;

- батир ээлеринин бардыгына жалпы үлүштүк менчик  укугунда тийиштүү жалпы пайдалануунун турак жай фондун, мүлкүн сактоо жана туура  күтүүгө багытталган иштерди координациялоо;

- өзүнүн турак жай фондуна болгон менчиктик  сезимге үйрөтүү жана жаңы мамилеге тарбиялоо боюнча маалыматтык-түшүндүрүү  иштерин өткөрүү;

- турак жай-коммуналдык чарба жана жашоо  тиричиликти камсыздоо тутумунун абалын, анын өнүгүү тенденциясын талдоо жана  алардын мындан ары өнүгүшү, ишинин натыйжалуулугун жогорулатуу боюнча чечимдерди  кабыл алуу үчүн сунуштарды даярдоо;

- турак жай-коммуналдык чарба жана  отун-энергетикалык комплекси тармагында жаңы технологияны иштеп чыгуу жана  киргизүү;

- Бишкек шаарынын коммуналдык кызмат  көрсөтүүчүлөрүнүн, калкынын жана жергиликтүү өз алдынча башкаруу органдарынын  кызыкчылыктарын эске алуучу бирдиктүү тарифтик саясатты жана баа коюуну  жүргүзүүгө көмөктөшүү;

- жергиликтүү өз алдынча башкаруу органдары  тарабынан бекитилген Бишкек шаарынын мэриясынын турак жай-коммуналдык чарба жана  жашоо тиричиликти камсыздоо тутумунун уюмдарынын тарифтерди колдонуусун  контролдоо;

- турак жай-коммуналдык чарбасынын бардык  ишканаларына, уюмдарына тармактарды өнүктүрүү, Бишкек шаарынын аймагында, жалпы  республика боюнча жана анын чегинен тышкаркы өз ара өнөктөштүк байланыштарды  белгилөө боюнча инвестициялык программаларды иштеп чыгууга жана ишке ашырууга  көмөктөшүү;

- коммуналдык кызматтарды көрсөтүүчүлөр жана  керектөөчүлөр ортосунда укуктук мамилелерди өркүндөтүүгө жана тутумдаштырууга  көмөктөшүү;

- жергиликтүү өз алдынча башкаруу органдарынын  чечими менен муниципалдык тапшырык боюнча иштерге, кызматтарга төлөөгө арналган  бюджеттик каражаттарды максаттуу жана натыйжалуу пайдаланууну  контролдоо;

- Бишкек шаарынын аймагындагы катуу тиричилик  таштандыларын жыйноо, ташып чыгаруу жана керекке жаратууну уюштуруу боюнча  иштерди координациялоо.

4. Башкармалыктын укуктары жана  милдеттери

9. Башкармалык төмөнкүлөргө укуктуу:

- Кыргыз Республикасынын мыйзамдарына ылайык  Башкармалыктын ишин камсыздоого багытталган келишимдерди, контракттарды,  макулдашууларды жана башка документтерди түзүүгө;

- Башкармалыктын ишинин ченемдик укуктук базасын  өркүндөтүү боюнча сунуштарды киргизүүгө;

- Башкармалыктын компетенциясына кирген маселелер боюнча комиссиялардын,  атайын жумушчу топтордун ишине катышууга;

- шаардык чарбанын, турак жай фондунун жана  инженердик инфратүзүмдүн объекттерин күтүү боюнча иштерди жана кызматтарды  аткаруу үчүн тапшырыкчы катары чыгууга;

- кызматтарды көрсөтүүнүн жана керектөөчүлөрдүн  укуктарын коргоонун стандарттарына ылайык келүүчү коммуналдык кызматтардын  бардык түрлөрү үчүн келишимдердин, контракттардын жаңы типтерин иштеп чыгууга  катышууга;

- шаардын жергиликтүү өз алдынча башкаруу  органдарынын чечими боюнча иштердин жана кызматтардын (муниципалдык тапшырык)  аткарылышын калыптандырууга, жайгаштырууга жана контролдоого;

- Кыргыз Республикасындагы жана чет  мамлекеттердеги жумуштук байланыштарды жүзөгө ашырууга, чет мамлекеттик  мекемелердин, уюмдардын жана фирмалардын өкүлдөрү менен, ошондой эле чет  мамлекеттик жарандар менен Башкармалыктын компетенциясына кирүүчү маселелер  боюнча байланышта болууга;

- жарандарды кабыл алууга, келип түшкөн  сунуштарды, арыздарды жана даттанууларды өз компетенциясынын маселелери боюнча  карап чыгууга, алар боюнча керек болгон чараларды көрүүгө;

- Кыргыз Республикасынын эмгек мыйзамдарына  ылайык кызматкерлерди жумушка кабыл алууга жана бошотууга;

- өз компетенциясынын чегинде буйруктарды  чыгарууга;

- жарманкелерге жана көргөзмөлөргө катышууга,  адистештирилген көргөзмөлөрдү, симпозиумдарды жана семинарларды уюштурууга,  жарнамалык адабияттарды басып чыгарууга;

- Башкармалыктын ишине байланыштуу маселелерди  чечүү үчүн адистерди чет мамлекеттик иш сапарларына жиберүү жана Кыргыз  Республикасында кабыл алууга;

- Кыргыз Республикасындагы жана чет  мамлекеттердеги уюмдар жана жеке жактар менен телеграф, телефон, телефакс  аркылуу кат жазышууну жүзөгө ашырууга;

- банктарда жана башка насыялык мекемелерде  эсептик, валюталык жана башка эсептерди ачууга, улуттук жана чет элдик валютада  накталай эмес да, накталай да акча каражаттары менен эсептерди жүргүзүүгө,  насыяларды (зайымдарды) алууга.

10. Башкармалык төмөнкүлөргө  милдеттүү:

- кызматкерлерге коопсуз эмгек шарттарын  камсыздоого жана алардын ден соолугуна, эмгекке жөндөмдүүлүгүнө келтирилген  залалдар үчүн жоопкерчилик тартууга;

- Башкармалыктын кызматкерлерин социалдык,  медициналык жана милдеттүү камсыздандыруунун башка түрлөрү менен камсыз  кылууга;

- ыкчам башкарууга берилген мүлктүн сакталышын  камсыз кылууга;

- белгиленген тартипте башка милдеттерди  аткарууга.

5. Башкармалыктын ишин уюштуруу

11. Башкармалыктын жогорку органы болуп Бишкек  шаарынын мэриясы эсептелет, ал мыйзамдарга ылайык төмөнкү маселелерди  чечет: 

- Башкармалыкты түзүү;

- Башкармалыктын жобосун бекитүү жана ага  өзгөртүүлөрдү, толуктоолорду киргизүү;

- Башкармалыкты кайра уюштуруу жана  жоюу;

- Башкармалыктын түзүмүн, штаттык ырааттамасын,  кирешелер жана чыгымдар сметасын бекитүү;

- начальникти жана анын орун басарын кызмат  ордуна дайындоо жана бошотуу.

12. Бишкек шаарынын мэриясы Башкармалыктын ишине  тийиштүү бардык маселелер боюнча чечим кабыл алууга укуктуу.

13. Башкармалыкты муниципалдык кызмат жөнүндө  мыйзамдарга ылайык кызмат ордуна дайындалуучу жана бошотулуучу начальник  башкарат.

14. Башкармалыктын начальниги:

- Башкармалыктын ишин уюштурат жана  жетектейт;

- Башкармалыкка жүктөлгөн милдеттердин  аткарылышына жеке жоопкерчилик тартат;

- белгиленген штаттык сандын жана эмгек акы  фондунун чегинде Башкармалыктын штаттык ырааттамасын, түзүмүн жана иш тартибин  Бишкек шаарынын мэриясына бекитүүгө сунуштайт;

- бекитилген штаттык ырааттамага жана Кыргыз  Республикасынын муниципалдык кызмат жөнүндө мыйзамдарына ылайык Башкармалыктын  кызматкерлерин сынактык негизде кызматка дайындайт жана бошотот;

- Бишкек шаарынын жергиликтүү өз алдынча башкаруу  органдары, Кыргыз Республикасынын мамлекеттик органдары, коомдук жана эл аралык  уюмдар, чет мамлекеттик юридикалык жана жеке жактар менен өз ара мамилелерде  Башкармалыктын атынан чыгат;

- Башкармалыктын атынан ишеним катсыз бүтүмдөрдү  түзөт;

- Башкармалыктын кызматтык милдеттерин жана башка  ички документтерин бекитет;

- өзүнүн ыйгарым укуктарынын чегинде  Башкармалыктын мүлкүн, акча каражатын кошуу менен башкарат;

- Башкармалыктын кызматкерлери аткарууга  милдеттүү болгон буйруктарды чыгарат;

- Кыргыз Республикасынын мыйзамдарына ылайык,  Бишкек шаарынын мэриясы тарабынан бекитилген сметанын чегинде Башкармалыктын  кызматкерлерине карата сыйлоо жана жаза чараларын колдонот;

- Кыргыз Республикасынын мыйзамдарына жана  өндүрүштүк зарылчылыкка ылайык Башкармалыктын жумуш шарттамын  белгилейт.

15. Башкармалыктын начальниги бир орун басарга  ээ.

Башкармалыктын начальнигинин орун басары Бишкек  шаарынын мэриясы тарабынан муниципалдык кызмат жөнүндө мыйзамдарда белгиленген  тартипте кызмат ордуна дайындалат жана кызматтан бошотулат.

Башкармалыктын начальниги жок болгон учурда  (эмгекке убактылуу жарамсыздык, кызматтык иш сапар ж.б.) же Башкармалыктын  начальнигинин ыйгарым укуктары токтотулганда, анын ыйгарым укуктарын  Башкармалыктын начальнигинин орун басары убактылуу жүзөгө ашырат.

Начальник жок болгон учурда Башкармалыктын  финансылык документтерине кол коюу укугу, бул жөнүндө начальниктин тийиштүү  буйругунун негизинде начальниктин орун басарына берилет.

6. Башкармалыктын материалдык-финансылык  камсыздалышы

16. Башкармалыкка мүлк ыкчам башкаруу укугунда  бекитилет.

17. Башкармалык өзүнө бекитилген мүлктү (негизги  каражаттарды) Бишкек шаарынын мэриясынын макулдугу менен гана тескөөгө  укуктуу.

18. Башкармалыкты күтүүгө чыгымдарды каржылоо  шаардык бюджеттин эсебинен Бишкек шаарынын мэриясы тарабынан бекитилген чыгымдар  сметасына ылайык жүзөгө ашырылат.

7. Эсепке алуу жана отчёттуулук

19. Башкармалык өзүнүн ишинин жыйынтыктарын  эсепке алууну жүзөгө ашырат, белгиленген тартипте бухгалтердик жана  статистикалык отчёттуулукту жүргүзөт жана анын аныктыгы үчүн жоопкерчилик  тартат.

20. Башкармалыктын начальниги жана башкы  бухгалтери эсепке алуунун тууралыгы жана Башкармалыктын финансы каражаттарын  жана мүлкүн максаттуу пайдаланылышы үчүн жоопкерчилик тартышат. КРнын Эмгек  кодексине ылайык толук материалдык жоопкерчилик тартышат.

8. Башкармалыкты кайра уюштуруу жана  жоюу

21 Башкармалыкты кайра уюштуруу же жоюу Кыргыз  Республикасынын мыйзамдарында белгиленген тартипте жүзөгө ашырылат.

22. Башкармалыктын кайра уюштуруу (биригүү,  кошулуу, бөлүнүү, бөлүп чыгаруу, кайра түзүү) Бишкек шаарынын мэриясынын чечими  боюнча жүргүзүлүшү мүмкүн.

23. Башкармалыкты жоюу Бишкек шаарынын мэриясынын  же соттун чечими боюнча жүргүзүлөт.

24. Кредиторлордун талаптары канааттандырылгандан  кийин калган Башкармалыктын мүлкү, бул мүлккө буюмдук укугу же Башкармалыкка  карата милдеттенмелик укугу бар Бишкек шаарынын мэриясынын атынан анын  уюмдаштыруучусуна өткөрүлүп берилет.

25. Башкармалык каттоочу орган тарабынан тиешелүү  чечим кабыл алынган учурдан тартып жоюлган деп эсептелет.

26. Башкармалыктын иш процессинде пайда болгон  документтер Кыргыз Республикасынын "Кыргыз Республикасынын Улуттук архив фонду  жөнүндө" Мыйзамына ылайык пайдаланылат жана  сакталат.